Zija Grapshi (1931). Aktor. Lindi në Gjirokastër. Mbaroi liceun artistik “Jordan Misja” (1952). Fillimisht u aktivizua në grupin filodramatik pranë “Radio Tiranës” që nga viti 1949, më pas ka luajtur role në zhanret e komedisë, sidomos në teatrin e Estradës së Shtetit, disa role në Teatrin Popullor, por më së shumti u bë i njohur si aktor i teatrit të Kukullave të Tiranës, ku edhe ka punuar më gjatë (mbi 40 vjet, nga viti 1951) dhe ku ka dhënë ndihmesën e tij më të madhe.Ka qenë pedagog në Institutin e Lartë të Arteve për disa vjet, nga 1967. Në mbi 160 shfaqjet e shumta të teatrit të kukullave ku mori pjesë, ka luajtur në përgjithësi role kryesore, ku u bë i dashur për femijët me rolet e Shvejkut (1957), Ivanit të madh (1959), sidomos me figurën e Baba Vitit në pjesën homonime të Violeta Kongos (1987).Zëri i tij i veçante, me një ngjyrim karakteristik, pakëz i çjerrë dhe si i shurdhët; aftësitë imituese, kujdesi për të qenë sa më i natyrshëm, si dhe ndjesia e vërtetësisë në marrëdhëniet me partneret – këto kanë qenë disa nga cilësitë e tij interpretative më të zëshme në krijimin e figurave-kafshë, posaçërisht asaj të ariut.Rëndom, si në Teatrin e Kukullave, ashtu edhe në Teatrin e Estradës dhe atë dramatik, ka interpretuar role me mbartje pozitive, njerëz të moshuar, gjyshër të mençur e të dashur, pleq këshillëdhënës, gaztorë etj. Krahas punës si aktor, ka vënë në skenë si regjisor mbi 20 projekte në Teatrin Kombëtar të Kukullave.Z. Grapshi ka luajtur edhe në 7 filma role të dyta dhe episodike, ku është dalluar gjithashtu për vërtetësinë e aktrimit dhe sjelljet e përnjëmendta, vetjake, që krijonin veçanësi në portretizimin e karaktereve. Mban titullin “Artist i merituar”.
marre nga aktoret shqiptare
