Elegji motre...
Më fal që u ligështova
Dhe nurin ta prisha ca
Jam motër e kurrë mos qofsha
OOO…Vëlla i motrës vëllaaa…
Më ike në ditë feste
Siç ikin zogjtë e Kosovës
E dhimbjet mbijnë mbi dhimbje
o lot o trishtim i motrës…
Më fal që i lutem Zotit
Të dal nga ky makth i rëndë,
Të zgjohesh ti afër nënës
E unë në shtratin tënd…
Në cilën dhimbjeTë të kërkoj!
Emrin tënd
S’e shkruaj dot
Nëpër ditarë
Prej kujtimesh!
As në kornizat
E një të djeshmeje
Portretit tënd
S’i gjej dot vend!
Po…dallg’ e mallit
Kur më rrëmben
E flakët shpirtit
Më flakërojnë,
Më thuaj motrës
Ti Engjëllush
Në cilën dhimbje Të të Kërkoj!!!
Mall…
Mbrëmë ngrysa natën në dritare, vëlla
Gjysmëfjetur, gjysmëvdekur!
Të prita
si Doruntina Konstantinin
gjersa përmbushi amanetin…
Trokun e kalit nuk e ndjeva.
Ti zbrite lehtë, vëlla.
U ndale pak mbi supin tim
siç ndalet flutura mbi lëndinë
Dhe ike qiellit fluturim
Sapo ta ndjeva ngrohtësinë!
