Ëndërrimtare e paparashikueshme
si gështenjë që shpërthen në prush,
herë kërcet krejt kërcënueshme,
herë kërcen e shpirtin ma mbush.
Herë si kërpudhë e helmueshme,
herë shijon si i thati e ëmbli rrush.
Përbindësh – Bishë shkatërruese!
E herë më quan tëndin lepurush.
Herë më vjen nëpërkë helmuese,
herë kotele që përkëdhel me push.
Herë e acartë, e akullt, drithëruese,
herë e flaktë, përvëlonjëse si gusht.
Dhelpërake, dhelatore ngacmuese,
e herë monstruoze godet me grusht.
Herë ngadalë, e butë, përqafuese,
e herë dhëmbët mi ngjet ngushtë.
O ëndërrimtare e paparashikueshme,
më deh si verë e athët, herë si musht.
