Vetëm presidentes Vjosa Osmani, i është lejuar që të marrë pjesë në varrimin e mikeshës së madhe të shqiptarëve, ish-Sekretares amerikane të Shtetit, Madeleine Albright.
Burime diplomatike të Metros në Prishtinë, kanë informuar se vetëm presidentja Osmani është lejuar që të marrë pjesë në varrim të ish-Sekretares amerikane të Shtetit, Madeleine Albright.
Pjesëmarrës në varrimin e Albright nuk do të mund të jenë pjesëtarë të tjerë të koalicionit nga Parlamenti dhe Qeveria. Kjo nuk u është mundësuar dhe protokolli nuk iu ka kthyer fare përgjigje për pjesëmarrje.
Presidentja e Kosovës, Vjosa Osmani, në fillim të javës së ardhshme do të udhëtojë në SHBA, ku do të marr pjesë në varrimin e Albright.
Kjo është konfirmuar për Metron, nga Zyra e Presidentes, Osmani.
Këshilltari për media, Bekim Kupina ka thënë për Metron se me ftesë së familjes Albright, presidentja Osmani do të udhëtojë për SHBA në fillim të javës që vjen, për të marrë pjesë në varrim të ish-Sekretares Albright.
“Presidentja Osmani do të udhëtoj për SHBA në fillim të javës që vjen për të marrë pjesë në varrim të Sekretares Albright, me ftesë të familjes Albright, si dhe për disa takime të tjera”, ka thënë Kupina.
Mikja e madhe e shqiptarëve, Madeleine Albright, ka vdekur më 23 mars në moshën 84-vjeçare.
Ajo vlerësohet për ndikimin e madh për të bindur Shtetet e Bashkuara të Amerikës dhe botën për krimet që po kryheshin në Kosovë nga ushtria dhe policia serbe.
Albright ka vizituar tri herë Kosovën, pak muaj pas përfundimit të luftës 1999, më 2005 dhe 2019. Më 2005, mbajti një fjalim në Kuvendin e Kosovës, ndërkohë më 2019, ishte e pranishme në ngritjen e bustit të saj në Prishtinë.
Ajo ishte gruaja e parë sekretare e shtetit të SHBA-së, e cila ndihmoi në drejtimin e politikës së jashtme perëndimore pas Luftës së Ftohtë.
Familja e saj ka bërë të ditur se Albright ka vdekur shkaku i kancerit dhe se në momentet e fundit ishte e rrethuar me anëtarët e familjes.
Në nderim të mikës së madhe të Kosovës, Madeleine Albright, presidentja e Kosovës, Vjosa Osmani e kishte shpallur 24 marsin ditë zie në Kosovë.
