të kam thënë
mos ma rrëmbe natën,
kohën kur e ndezi dhe fiku diellin
me një sustë,
me një gisht,
ose me grusht
në rast neuroze
mbaje ditën ditëdritën
që nuk e ndezim as ti as unë
sa kur na bjen në kokë
ikim mrizeve si delet
lërma natën këtë pusëqorre
që e ndezi dhe e fiku
me një gisht
a grusht
varësisht si më kapë dalldia
të kam thënë
një refren takash
rend syve të mi
ritëm i çuditshëm
pa fillim as fund
më troket retinës
shtegut të ngjyrave
pikë më bëhet
prikë e fatit të zverdhur
si gjeth vjeshte
një refren takash
dje ishin të gjithë
edhe ti
edhe ai
edhe ajo
edhe ata
dhe një gotë bosh
kisha punë
shumë punë
dhe halle plot
sot mungojnë të gjithë
pos meje
dhe një gote plot
në mes një copë kohë
u ngrit si mur
…dje ishin të gjithë
