Këto ditë pa dritën e botimit libri “FJALË TË ARTA” i autorit Abdirahim Idrizi.
Botues: Sh. B. “Thesari”
Redaktor: Demir Reshiti
Redaktor gjuhësor: Arton Ahmetaj
Përgatitja teknike: Adil Beqaj
Shkrimtari e publicisti, Abdirahim Idrizi, për vite të tëra në notesin e tij ka shënuar fjalë të urta dhe sentenca, pjesa më e madhe e së cilave lidhet me përvojën e tij jetësore dhe sfidat, që ka kaluar gjatë shtatë dekadave të jetës. Autori mblodhi fjalë të urta (dhe terma të lidhura), pothuajse gjatë gjithë jetës së tij dhe i shkroi e sistemoi ato…
Autori, nëpërmjet fjalëve e shprehjeve të urta e të arta, të cilat në të shumtën e rasteve janë mësime të nxjerra nga jeta, mëton t’iu ofrojë lexuesve këshilla me vlerë, në mënyrë që do t’iu shërbenin atyre për t’u ballafaquar me sfidat, që sjell jeta.
E gjithë lënda e shtruar, brenda kapakëve të këtij libri, ndahet në katër pjesë. Në kapitullin e parë të titulluar “Mesazhe të ndryshme”, zënë vend fjalët e arta dhe mesazhet për punën e suksesin. Autori aty jep dhe përmend shumë raste nga përvoja e tij jetësore, nga sukseset e sfidat dhe, gjithashtu, publikohen fjalë të urta e shprehje nga njerëzit, që i ndërruan faqen botës, si dhe disa porosi me vlerë nga filozofi skocez, Adam Smith.
Në kapitullin e dytë të titulluar “Për punën dhe suksesin”, prezantohet një numër i konsideruar i mesazheve të ndryshme e ndër të tjera edhe sekreti i numrit shtatë. Thëniet e zgjedhura për jetën dhe të dhëna interesante për Shoqërinë e Mosuove. Autori në këtë kapitull i ofron lexuesit edhe një lloj çelësi për ta ndryshuar jetën. Ndërsa kapitulli përmbyllet me amanetin e shkrimtarit Gani Xhafolli, tashmë të ndjerë, për autorin e librit, Abdirahim Idrizi. Mjaft interesante janë edhe mendimet aforistike dhe mesazhet për dashurinë, të cilat autori i ka pasur të publikuara në rrjetet sociale edhe në portalin telegrafi.com. Këto mendime dhe mesazhe janë përmbledhur në kapitullin e tretë, të titulluar “Mesazhe dashurie”. Në këtë kapitull autori na ofron mesazhe interesante mbi fuqinë e dashurisë, mbi martesën dhe mbi lumturinë
Libri mbyllet me kapitullin e katërt, të titulluar “Të qeshim pak”, që mund ta quajmë edhe si qershia mbi tortë, ngase lexuesi relaksohet me dromca humori, të cilat autori i ka përzgjedhur me delikatesë.
Vlen të theksohet se ky libër me fjalë të urta është një pasqyrë e artë jo vetëm e urtësisë shekullore shqiptare, por edhe e një mësimi që koha nuk do të mund ta zhvlerësojë. (D.R.)
