Sot bëhen plot 32 vjet nga ndeshja ndoshta më e famshme që nuk është luajtur ndonjëherë. Është 30 maji i vitit 1990. Në stadiumin “Maksimir”, luhet derbi i futbollit jugosllav mes Dinamos së Zagrepit dhe Cërvena Zvezdës të Beogradit.
Ishte koha kur fërkimet etnike në Jugosllavi kishin nisur, kur kroatët dhe serbët ishin në gjendje tensioni mes tyre dhe një situatë e tillë do të shprehej më shumë se kudo tjetër në shkallët e stadiumit, ku tifozët nacionalistë të Cërvena Zvezdës, të ashtuquajturit “Delije”, kishin zbarkuar në kryeqytetin kroat për të nxitur trazira.
Të udhëhequr nga krimineli Arkan, tifozët e Zvezdës nisën të shkatërrojnë tribunën, me synim për të arritur tek vendas. Ata prishën rrethimin dhe sulmuan tifozët e Dinamos me stola dhe me thika. Ndërkohë tifozët e Dinamos thyen po ashtu rrethimin dhe u futën në fushë për të arritur drejt serbëve. Aty ata u ndeshën me kundërshtimin e forcave të policisë. Pikërisht në këtë moment kapiteni i Dinamos, Boban, 21 vjeç, u doli në krahë bashkëqytatarëve të tij, duke goditur me shkelm një polic. Nga kroatët shkelmi i Boban, quhet edhe si “Shkelmi i pavarësisë”.
