Dielli im…
Sa ngjyra kanë ata dy sy
E sa më thonë ashtu në heshtje.
Por unë kam frikë të pyes ty
Prandaj mbetem në kureshtje!
Kur ti i mbyll më fshihet bota
Kur i hap sërish më vjen
Rreze zjarri, sa të forta
Le t’ më djegin. Më pëlqen …
Më pëlqen të robërohem
Asaj ngjyre që mahnit.
E në ndodhtë të dashurohem
Ti mos fol … Mos u çudit!
E në ndodhtë të dashurohesh
Lëri sytë të flasin vetë
Dashurisë kur i nënshtrohesh
Vërteton që je në jetë!
