Kryeministri i Kosovës, Albin Kurti ka debatuar dhe është përplasur me homologen e saj nga Serbia, Ana Bërnabiq në një panel diskutimi në Bled të Sllovenisë të hënën.
Kryeministri i Kosovës ka thënë se “nuk është e lehtë” për Kosovën që t’i normalizojë marrëdhëniet me Serbinë.
“Mbështetja e Kosovës për BE-në është 95 për qind, në Serbia është 45 për qind. Ne kemi vendosur sanksione ndaj Federatës Ruse, Serbia nuk është duke menduar për këtë. Ata nuk e kanë distancuar vetën e tyre as nga Millosheviqi, as nga Putini. Nuk është e lehtë për ne. Unë dua që t’i normalizojmë marrëdhëniet dhe do ta bëja këtë menjëherë, p.sh., nëse fqinji im do të ishte Republika Çeke”
Më tutje Kurti ka thënë se normalizimi i marrëdhënieve me Serbinë është shumë më i vështirë.
”Mund edhe të ndodhë, sepse na duhet të zbatojmë Marrëveshjen Bazë, për të cilën presidenti i Serbisë dhe unë u pajtuam në Bruksel.Por normalizimi në psikologji do të thotë mungesë konfuzioni midis realitetit dhe fantazisë, dhe ky është një tjetër regjistër ku unë për fat të keq nuk mund të kontribuoj”, ka thënë Kurti.
Gjatë fjalës së tij Kurti është duartrokitur nga ana e të pranishmëve.
