Poeti Milot Selmani pas debutimit të suksesshëm në letrat shqipe me librin “Arti i të larguarit”, brenda një periudhe të shkurtër kohore vjen para lexuesit me vëllimin e dytë poetik. Në këtë libër me titull simbolik “Poet i mallkuar”, janë përfshirë 89 poezi të ndara në katër cikle: “Mos shko”; “E bekuara femër”; “Lule e këputur” dhe “Në sytë e tu”. Ndonëse poezitë janë të ndara në cikle, ato përdorin një temë të përbashkët të dashurisë, ndjenjave të forta personale, dhimbjes, humbjes…
Po t’ua bësh një analizë këtyre poezive, përkatësisht një shqyrtim të thellë të temave dhe stilit, vëren një interpretim mjeshtëror të emocioneve të shprehura nga poeti nëpërmjet vargjeve. Ndjenjat e mërzisë dhe vetmisë shfaqen në formë të një bisede me veten dhe me botën që e rrethon poetin. Pothuajse në secilin varg, por edhe ndërmjet vargjeve, vërehen ndjenjat e përziera të poetit dhe lidhja e tij shpirtërore me temën të cilës i është qasur.
Poezitë e përmbledhura në vëllimin poetik “Poet i mallkuar”, paraqesin një shqyrtim të thellë të ndjenjave dhe përqendrohen në eksplorimin e aspekteve të ndryshme të dashurisë dhe jetës njerëzore. Përdorimi i imazheve poetike dhe metaforave kontribuon në thellësinë e përjetimit të shpirtit dhe emocioneve të autorit.
Milot Selmani me poezitë e kësaj përmbledhjeje ka rrumbullakuar një vepër e cila lexuesve u fal kënaqësi artistike e estetike në mënyrë që ata të bëhen pjesë e përjetimit – personazh besnikë të së mirës, të shpirtit të mirë të vënë në letër, në formën e figurës dhe artit poetik.
Botues:
Sh.B. “Thesari”, Prishtinë
Redaktor:
Demir Reshiti
Recensensues:
Besim Cena
Redaktor gjuhësor:
Lindita Dinosha
Ballina:
Metin Selmani
Përgatitja teknike:
Studio a&a design
Shtypi:
Lena Graphics Design, Prishtinë
Autorit i urojmë suksese të reja në krijimtarinë artistike dhe nga pena e tij presim botime të tjera. (D.Reshiti)
