Mesditen e sotme një aksident ka ndodhur në Lipjan, ku një veturë ka goditur dy qytetarë pranë stacionit policor të kësaj komune.
Por, krahas kësaj, një zyrtar policor është detyruar të përdor edhe armën.
Këtë e ka konfirmuar për Gazetën Online Reporteri.net, zëdhënësi i Inspektoratit Policor të Kosovës, Arbër Beka, i cili ka bërë të ditur se shtëna me armë ka ndodhur përpjetë me qëllim të parandalimit të incidentit mes disa të dyshuarve.
Duke ju referuar kërkesēs suaj IPK ju konfirmon se është njoftuar nga Policia e Kosovēs lidhur me incidentin në Lipjan ku dyshohet se është përdorur arma zyrtare për të parandaluar lëndimin trupor në një incident mes disa të dyshuarve. Deri tani nuk ka raportime pēr ndonjë të lënduar nga perdorimi i armës zyrtare ( informacionet e para janë se zyrtari ka shtënë përpjetë për të parandaluar incidentin)”.
“Hetuesit e IPKsë sipas detyrës zyrtare do të dalin në vendin e ngjarjes kurse veprimet tjera do të ndërmerren bazuar në autorizimet ligjore”, tha Beka për Reporteri.net.
Lidhur me aksidentin kanë folur për Reporteri.net edhe nga Policia e Kosovës.
Zëdhënësja e policisë për rajonin e Prishtinës, Flora Ahmeti ka bërë të ditur se një nga personat që ka qenë në veturë ka goditur qëllimisht dy të tjerë, e si pasojë për të vënë situatën nën kontroll një polic është detyruar të shtijë me armë në ajër.
“Sot rreth orës 14:00, kemi pranuar informatën për një rrahje në fshatin Rusinovc të Lipjanit. Në rast kanë qenë të përfshirë disa persona, ku njëri nga ta është lënduar. Personat e dyshuar kanë vazhduar mosmarrëveshjen edhe në afërsi të stacionit të policisë në Lipjan, ku njëri nga personat e dyshuar me automjet ka goditur qëllimisht dy persona , të cilët kanë pësuar lëndime dhe janë dërguar për tretman mjekësor. Përgjatë përpjekjeve për të menanaxhuar dhe futur nën kontrollë situatën një nga zyrtarët policor ka shtënë në ajër. Lidhur me këtë rast në cilësinë e personave të dyshuar po intervistohen katër persona, ndërkohë që hetuesit në koordinim me prokurorinë dhe IPK-në po kryejn veprimet e nevojshme hetimore”, tha Ahmeti për Reporteri.net.
