Bandat shqiptare kanë nisur të grabisin biçikletat luksoze që kushtojnë mijëra paundë. Vjedhjet kryhen kryesisht në lagjet e pasura të Londrës. Sipas mediave britanike muajt e fundit ka pasur një sërë grabitjesh midis orës 5 dhe 7 të mëngjesit, duke synuar çiklistët me biçikleta të shtrenjta. Organizatat britanike të çiklizmit, po përgatisin një letër për Sir Mark Rowley, komisionerin e Policisë Metropolitane. Ata do t’i bëjnë thirrje policisë për më shumë oficerë që të vendosen në zonë pasi biçikletat e tyre të kushtueshme po vidhen dita-ditës.
Mediat shkruajnë se çiklistëve që iu është vjedhur biçikleta iu është thënë nga policia se grabitjet po kryhen nga një bandë shqiptare. Kjo e fundit sipas mediave po i dërgon mjetet në Rusi në mes të sanksioneve të vendosura ndaj vendit pas pushtimit të Ukrainës. Grupi Regent’s Park Cyclists tha se më shumë se 30 klube, të cilat përbëhen nga më shumë se 5,000 anëtarë, janë drejtuar për më shumë siguri në zonë.
“Hajdutët janë me të vërtetë atje në kërkim të njerëzve. Ata heqin targat nga biçikletat, veshin kapuç. Ata janë të përcaktuar qartë në rolin e tyre”, tha Sean Epstein, kryetar i grupit Regent’s Park Cyclists.
