Minatorët e Trepçës nuk kanë marrë pagat prej dy muajsh, për shkak të krizës financiare të kompanisë publike.
Shumë prej punonjësve edhe publikisht kanë treguar se gjendja e tyre financiare dhe e familjeve të tyre është rënduar dhe kanë hyrë në borxhe.
Një minator, në kushte anonimiteti, ka ndarë një bisedë me gruan e tij, ku bisedojnë për blerjen e disa ilaçeve për fëmijën e tyre të sëmurë.
Minatori që doli në qytet për t’i blerë ilaçet për femijën, i shkruan gruas se po bëhen 20 euro edhe në barnatore nuk po ia japin borxh. “Ishalla naten bile si dhem”, shton minatori.
“Po ja lypi ni shoku nja 5 ero tmi gjet, veq qato pika bile”, ia kthen minatori gruas së tij, kur ajo i thotë që së paku një ilaç të mund t’ia blejnë.
Minatori nuk ka dashur ta zbulojë identitetin, por vetëm të tregojë për gjendjen e rëndë financiare me të cilën po përballet ai dhe shumë kolegë të tij, për shkak të punës pa marrë paga për dy muaj.
