Në kopshtin e Gjetsemanit në Sinedrin
puthja që Judë Iskarioti i bëri Jezusit
ka mbetur ende në ajër
Plot dymijë vjet emri i tij
vazhdon të mallkohet nga besimtarët e Krishtit
plot dymijë vjet që faqet e Biblës
vazhdojnë t’i drejtojnë shigjetat mbi të
Dhe gurët e ndëshkimit drejtohen drejt atij
mitet i ngjajnë idiotit të lagjes sime
që i gjuan me gurë hënës
kur shfaqet e plotë në qiell
Tradhtar
thonë besnikët e Jezusit
mbasi e kanë tepruar me një gotë verë
dhe ju merren këmbët
I pabesë thotë dhe prifti
me trupin e kërrusur si Vijë Theodhosi
Histeritë dhe mallkimet
vazhdojnë të shtresëzojnë njëra tjetrën
ndërsa lumi i zjarrit ka djegur dhe brigjet
Ndërsa prifti paraardhës
vazhdon të harrohet
Jud Iskarioti
vazhdon të qëndrojë në krah të Mesisë
dhe të japë për nesër
parashikimet e bursës…
