Kur vij pas teje
Moj hënë e plotë
Skuqesh prej meje
E s’më flet dot
Nis të largohem
Por s’më bën këmba
Pranë të t’qëndroj
Seç ma ka ënda
Rrëzë një reje
Syri t’bën dritë
Zjarrit brenda meje
S’mund ti bëj pritë
Zemra fort m’rreh
M’dridhen buz’, dorë
Mes yjesh kur zbret
Gazelë luleborë
Drejt meje kur vjen
Haplehtë si flutur
Gjaku për ty zien
Lozonjare bukur
Me syrin e zi
Më godet fort
Rashë në dashuri
Me ty hënë e plotë
Në dashuri rashë
Me ty vesë agimi
Që kur të pashë
Syzezë, filiz prilli
Me buzën qershi
E faqen si mollë
Thëllëzë perri
Sorkadhe belhollë
Me aromë pjeshke
E shijshme si ftua
Frut i pjekur vjeshte
Eja hënë me mua
Katër stinë të çelur
Hënë pesëmbëdhjetë
Në zemër të mbjellur
Do të mbaj përjetë
