E ujshme,
e rrjedhshme,
termike –
Grua!
Kur linda,
lotët e nënës
frynë ujërat syve të mi,
e qava.
Qava për gjyshërit
që deshën djalë.
Qava
në kapërcyell të vajzërisë,
kur veten pashë grua.
Kur nga nëna u ndava,
qava pse nëna qau.
Mes ujërave,
kur placenta më besoi birin në gji,
qava nga lumturia e paprovuar.
Pluskova mbi te qara!
Kam qarë
kur të desha,
kur më deshe,
kur më humbe,
kur më gjete
.
Ti,
kumbari i bukurisë sime –
gjithmonë
i lëngshëm.
