Milani po përgatitet për ndeshjen vendimtare jashtë fushe ndaj Lecces, në përpjekje për t’u rikthyer pas humbjes së parë në ligë në “San Siro” ndaj Cremoneses.
Megjithatë, trajneri Massimiliano Allegri ka marrë lajme të këqija nga seanca e fundit stërvitore.
Mesfushori shqiptar, Ardon Jashari, pësoi një lëndim pas një përplasjeje të rastësishme me shokun e skuadrës, Gimenez.
Allegri e konfirmoi incidentin në konferencë për media, duke pranuar se gjendja e lojtarit mbetet shqetësuese.
Sipas raporteve fillestare, lëndimi mund të mos jetë i lehtë. Frika më e madhe është se bëhet fjalë për një frakturë, e cila mund ta mbajë Jasharin jashtë fushave për disa muaj.
Kjo përbën një goditje të madhe për Milanin, pasi Jashari po kalonte një fazë të rëndësishme të integrimit, pas paraqitjes së mirë në Kupën e Italisë kundër Barit, ndonëse me një performancë më të zbehtë në kampionat ndaj Cremoneses.
Shkalla e saktë e lëndimeit pritet të përcaktohet pas kontrolleve mjekësore që do të kryhen në orët në vijim.
Jashari më gjasë do të mungojë edhe në ndeshjen Zvicër-Kosovë që do të luhet më 5 shtator në Basel në kuadër të kualifikueseve për Kupën e Botës 2026./RTK
