Sëmundjet kardiovaskulare vazhdojnë të jenë një nga shkaqet kryesore të vdekjeve në botë. Megjithatë, ekspertët theksojnë se rreziku i tyre mund të ulet ndjeshëm duke ndjekur një mënyrë jetese të shëndetshme: aktivitet fizik i rregullt, gjumë cilësor dhe menaxhim i stresit. Një ndikim të madh ka edhe dieta e përditshme.
“Çdo ushqim që vendosni në pjatë ndikon drejtpërdrejt në zemrën tuaj, sidomos në nivelet e kolesterolit dhe të sheqerit në gjak,” shpjegon kardiologia dr. Joyce Oen-Hsiao.
Kolesteroli i lartë favorizon krijimin e pllakëzave në arterie, duke rritur rrezikun për infarkt dhe goditje në tru. Po ashtu, konsumimi i tepërt i sheqernave mund të përshpejtojë këtë proces dhe të dëmtojë edhe veshkat. Për këtë arsye, kardiologët rekomandojnë disa ushqime që ata vetë i përfshijnë rregullisht në dietën e tyre:
Perime me gjethe jeshile
Spinaqi, lakra dhe perimet e tjera me gjethe janë burime të shkëlqyera antioksidantësh, vitaminash dhe fibrash. Ato ngopin pa rritur nivelin e sheqerit në gjak, duke mbrojtur kështu zemrën.
Arra dhe bajame
Dr. Oen-Hsiao sugjeron arrat dhe bajamet si zëvendësues idealë për ushqimet e ëmbla. Ato ofrojnë yndyrna të shëndetshme dhe janë një meze e lehtë e përsosur midis vakteve.
Panxhar
Sipas Dr. Shenkman, panxhari është i pasur me nitrate, të cilat përmirësojnë qarkullimin e gjakut dhe rregullojnë tensionin arterial. Mund të konsumohet i zier, i pjekur ose i shtuar në smoothie si një nxitës natyral para stërvitjes.
Avokado
E pasur me yndyrna të shëndetshme dhe fibra, avokado ndihmon në uljen e kolesterolit. Mund të shijohet në sallata, në sushi ose thjesht si një meze e lehtë.
Shalqi
Ky frutë freskues përmban L-citrulinë, një përbërës që ndihmon në relaksimin e enëve të gjakut dhe ul ngarkesën e zemrës. Gjithashtu ka përmbajtje të lartë uji për hidratim dhe antioksidantë që mbrojnë qarkullimin. Dr. Shenkman thotë se shalqirin e preferon si feta të ftohta ose të kombinuar në sallatë me rukola dhe mente.
/Motilokal.com
