KA MBI TRIDHJETË VITE
MË VIJNË FJALË TË NËNËS...
Sa të kishte hije
Shamija në kokë,
Flokët ngjyrë gështenje
Shkëlqenin mbi ballë,
MIRUSHE të quanin
Shoqet e katundit
Ty nënë që na mbaje
Në sy nën qepallë.
E mbaj mend moj loke
Sa isha i vogël
Atbotë vishje trupin
Me këmishë qenari,
Jelek, shokë e shall
Qendisur me ojma,
Pshtjellakët e leshtë
Ndritnin si fanari.
Kur vinim nga shkolla
Nga fusha e loja
Ne flisnim ti qeshje
Me plot ëmbëlsi,
Dhe kur kishte ndodhur
Bënim ndoj gabim,
Me këshillat tua
Ndjenim kënaqësi…
Rriteshim ngadalë
Me zemër të hapur,
Për mësim e shkollë
Na frymëzoje nënë,
Është det i pafund
Rrugëtimi dijes
Dhe duhej shumë mund
Diçka për të zënë.
PËR TY ZË I FJALËS, FLAKADAN I NDRITUR
(Poetit Ymer Elshani)
Na solli Karvani shkrimtarë nga gjithë trojet
Për të shtruar në Sofër me dhjetra poezi,
Sot këtu, kjo ditë, do fshij çdo pikë loti
Të ndijnë frymë magjike vargjet për fëmijë.
Pa le të bien zilet në shkollat fillore
Këngët e nderimit fare mos t’pushojnë,
E te pllakë mermeri ku ka rënë poeti
Kurorat me lule duam të pranverojnë.
Të mbëltohen vargjet nga faqet e bardha,
Me veprat e shkruara të ngritet kala,
Për ty zë i fjalës, emër përjetësie
Flakadan i ndritur o Ymer vëlla!
Cikël i vargjeve për fëmijë:
KUR FILLON KËNGË E BILBILIT
Kur fillon këngë e bilbilit
Bëhem shpend në maje kreshte,
Bëhem degë e bisk me gjethe
Bulëzoj si lule pjeshke.
Bëhem lodër fëmijërie
I buzëqeshur nisi lojen,
Si bletë bëhem, fluturake
Me nektar e mbushi zgjojen.
Bëhem ketër kureshtar
Fole zogjësh plot me vezë,
Fushë bleruar nga fije bari
Peshk për lumë, jo për truezë.
NË VARGJE POETI
Në vargje poeti
Gjelbëron livadhi,
Kurorës së lules
I rritet petali.
Pylli ndërron ngjyrën
Degëzat gjethojnë,
Ariu rrah daullen
Ketrat vallëzojnë.
Këndon gargullesha
Si me megafon,
Zëri saj i lartë
Gjumashët i zgjon.
Me penën magjike
Sjell ngrohtësi vere,
I mbëlton shpatijet
Me lëng manaferre.
- Poezi nga Sheremet Prokshi
