.
Rrëfimi që vjen nga Shtetet e Bashkuara për operacionin e natës mes së shtunës dhe së dielës për shpëtimin e një pilotit amerikan të zhdukur në Iran ngjan me skena filmi lufte. Ai ishte fshehur në një të çarë të vogël shkëmbore, ku ishte strehuar i plagosur, në një lartësi prej 2.000 metrash. Në qiell, aviacioni amerikan e kërkonte me helikopterë, dronë, satelitë dhe avionë, ndërsa mbi njëqind forca speciale ishin gati për ndërhyrje. Nga toka, ndërkohë, ekipet iraniane të kërkimit ishin të vendosura ta gjenin me çdo kusht.
Piloti është kthyer tashmë në një simbol. Për Iranin ai përfaqëson pafuqinë e makinerisë ushtarake amerikane në një konflikt të planifikuar keq dhe plot të papritura. Për Donald Trump, gjetja e tij është një shpërblim dhe dëshmi se gjithçka mund të realizohet, duke vazhduar njëkohësisht goditjet.
Por operacioni është jashtëzakonisht i ndërlikuar. Piloti i parë u gjet pas 8 orësh kërkime. Ndërsa për navigatorin e tij situata mbetet kritike: me kalimin e orëve, iranianët po i afrohen gjithnjë e më shumë. Ende nuk është e qartë shkalla e plagëve të tij; amerikanët thonë se është “në gjendje të rëndë”, megjithatë ai ka gjetur forcën të largohet nga lugina ku ishte hedhur me parashutë dhe të arrijë në një kreshtë shkëmbore.
Peizazhi është i zhveshur dhe mungesa e bimësisë së lartë e bën më të vështirë gjetjen e një strehimi. Ai përdor herë pas here sinjalizuesin e tij satelitor, duke e ditur se mund të zbulohet edhe nga iranianët. Ekziston edhe rreziku që ta gjejnë dhe ta përdorin si karrem për të ngritur një pritë ndaj ekipeve të shpëtimit – një taktikë e përdorur edhe më parë. Për mbrojtje ka vetëm pistoletën e shërbimit, e cila do të ishte e padobishme nëse do të zbulohej. Megjithatë, sinjalet e tij të ndërprera kapen nga Pentagoni.
Central Intelligence Agency shpërndan një mesazh të qëllimshëm për të ngatërruar inteligjencën e Teheranit: përhap lajmin se ai është gjetur dhe po evakuohet ngadalë me një autokolonë tokësore drejt Irakut. Ky informacion i rremë synon të shpërqendrojë forcat iraniane dhe t’i detyrojë të zhvendosin burime për të kërkuar konvojin.
Të shtunën në mëngjes, Donald Trump shton kërcënimet ndaj Iranit, duke deklaruar se do të donte të shkatërronte infrastrukturën e tyre energjetike. Ndërkohë përgatitet Team 6 i Navy SEALs, së bashku me elementë të zgjedhur të Delta Force dhe Rangers. Përdoren pajisje speciale për të lokalizuar vendin ku fshihet pilotin.
Me rënien e natës, edhe aviacioni izraelian bashkëpunon duke kryer bombardime. Avionët qëllojnë kundër forcave tokësore iraniane, ndërsa forcat speciale hapin zjarr, por shmangin përplasjet e drejtpërdrejta.
Përdoret një pistë e vjetër me rërë në afërsi. Kur e gjejnë pilotin, forcat speciale e ngarkojnë menjëherë në një helikopter. Por dy avionë transporti C-130 ngecin në rërë dhe nuk arrijnë të ngrihen. Duket se edhe dy helikopterë të lehtë kanë hasur probleme. Sipas një versioni, ende për t’u konfirmuar, këta mjete janë shkatërruar nga vetë amerikanët pas mbërritjes së një skuadre të re ajrore zëvendësuese.
Sipas The New York Times, ata janë bombarduar gjatë fazës përfundimtare të evakuimit. Mediat iraniane kanë publikuar pamje të mbetjeve të djegura të mjeteve ajrore amerikane në terrenin ranor.
“E kemi kapur”, shkruan me shkronja të mëdha Donald Trump në rrjetin X. Më pas ai rikthehet te kërcënimet ndaj infrastrukturës energjetike dhe urave iraniane: “Hapeni atë dreq Ngushticë, bastardë të çmendur, ose do të jetoni në ferr. Do ta shihni! Lavdi Allahut”, shton ai me tone aspak presidenciale./ Corriere della Sera
