AKUAREL PRANVERE
Perëndoi koha jote për sivjet,
dimër, s’di pse s’po largohesh?!
Mjaft tund e shkund dëborë,
ik të lutem, ik të çlodhesh!
S’e sheh që ka zbrit’ pranvera,
çastet e fundit po t’fotografon?!
Nga kurorë e bukur e bajames
dëborë e shkrirë po pikon!
Hipur kalit të bardhë të borës,
erë e prilltë vjen kaq e brishtë,
në duar mban një luledele,
që i shkëlqen si unazë në gisht!
Erë e prilltë i hapi portat,
buisën kurorat e pemëve!
Nëpër deg’ kompozuar me lule
zogjtë po japin koncerte!
