AH, JU SY!
Ah, ju sy kaq lakmitarë,
Det ku zemra ime tretet.
Ç’më gremiset shpat me shpat
E më bëtë të flas me vete.
Do ta hedh në hon lavdinë ,
Pasurinë do ta shkrij.
Futmëni thellë në qerpikë
Të shoh turmën që mërdhin
.
Futmëni thellë o në qepalla
Të prek shqotën dhe behar!
Te një këngë që hap kanatat
Të ndez gjakun, ta bëj zjarr.
Ah, ju sy kaq lakmitarë,
Derë ku zemra nxjerr të fshehtat.
Në u futsha thellë në varr
S’do më tresin amanetet.
Amanetet do t’ia lë birit
Të më marrë në valë e brigje
Nënë flatrat e pëllumbit
Mes zilisë së gjarpërinjve .
Herë barinj e herë kosëtarë,
Cep me cep t’i biem botës
Ah, ju sy kaq ëndërrimtarë,
Si s’u ngopët mes kullotës ?
Ah ju sy, kaq durimtarë,
Hapni dyer, shponi mure!
Jepni zemrës ditë të bardhë
Mbase enden përmes tyre.
