Rrugët e mia nuk janë rrugët tuaja
as rrugët tuaja nuk janë rrugët e mia
mos ngulni këmbë
se nuk ju shkojnë paralele të tilla
mund të ekzistojnë vetëm në fantazi
ose në dëshira pa busull
Që kur mësova të eci
pashë se një mal i madh
tridhjetë kodra
dhe tre lumenj të rrëmbyeshëm
me varka të mbytura
më ndanin prej jush
Ndaj edhe nëse do të dëshiroja
të kapërceja malin dhe kodrat
përsëri nuk do të mundja
Kjo është një shenje e vendosur
nga vullneti i zotëve
dhe një shenjë njohje
apostujt më kanë bindur për këtë
Unë jam unë
ndërsa ju jeni ju
Thuhet se kur lindim
fatet na përcaktojnë vitet e jetës
dhe rrugët që duhet të ndjekim në jetë
Rrugët e mia më çojnë drejt paqes
me vetveten dhe Zotin
ndaj jam e lumtur
Çdo mbrëmje
mbasi heq këpucët
filloj të ndjek rrugën e reve në qiell
dhe nis të fotografoj pamjet
e ndryshueshme të diellit të nesërm
ndërsa ju fotografoni erërat
Sa të ndryshëm
na kanë bërë ndarjet
dhe sa të huaj
Megjithatë nuk lodhem që t’ju kuptoj
sepse për këtë jam krijuar
Njerëz pa forma!
Fati ju ndihmoftë në hapat tuaj
dhe stuhitë e ardhshëm…
