Derdh në vargje
do të shkruaj atë çka ndjej
thellë në shpirt
me ëndrrat të vallëzoj
si mjellmë mbi liqenin e qetë
t’i them dëshirës merr krahë e fluturo
me tinguj shpirti mbi liqen valëzo
t’ia hapë dritarët zemrës
dhe t’i them buzëqesh ëndrrës
stinët le t’ia derdhin ngjyrat ëndrrës
si dorë artisti mbi pikturë
t’mi përkëdhel e lehta puhizë
pastaj t’i kthej në muzë
syri le të tret shikimin
atje lart mbi male dhe thellë në oqeane
të vështroj të bukurën
le t’a derdhë në vargje
t’i veshi fjalët
me petkun e mëndafshtë të hënës
t’i ligjeroj me zërin
që bulëzon nga thellësia e zemrës
