KALIGULA
Kaligula e shpalli kalin e tij
konsull romak
dhe senati i madh
u drodh i habitur
Askush nuk deshi t’iu besojë veshëve
askush nuk deshi që të ishte aty
mes kaq komedive shkruar nga perandori
U desh që të shkruhej dhe kjo komedi
kali i Kaligulës ishte sfide ndaj lavdive
kali i kaligulës ishte thjeshtë çmenduri
Statujat e perëndive
kërkuan të vetëvriten
dhe heronjtë e lavdishëm
zunë të thyenin shpatat një nga një
Vetëm kali hingëllinte duke ftuar të tjerët
që ta ndiqnin nga pas
sigurisht dhe i zoti i tij Kaligula
Edhe kalendari e nxori të tepërt vetveten
dhe nisi të griste fletët
pa parë kënd në sy
Kish ikur koha e njeriut
dhe po vinte koha e kuajve
gjerbonin pikat nën çati
dhe Romës i vinte
një erë e rëndë
prej kufome
