Kërkoj babain
Në Ditën e babait
Shumë gjëra më mungojnë natë e ditë
Fjala e babait më mungon më shumë
Ku është shtylla e vjetër e shtëpisë
Ku është kolona e familjes së urtë.
Ku është xhepi mbushur me karamele
që na ndriste sytë e na ëmbëlsonin
oh nuk ta harroj kurrë atë buzëqeshje
dhe hapat e tu gjithë i gëzonin
Sikur të shoh me xhaketën në një dorë
një kapelen nën sy që ishte si një diell
porositë e tua ishin si rrjedhë kroi
sikur na jepnin në sy një tjetër qiell\
Doja sërish t’i puthja duart e tua
të lodhura nga puna të lodhura nga vitet
fjala jote ishte një rrugë e pambaruar
që na mbeti si shufra e madhe e florinjtë
Kërkoj burra të tjerë që ty mbase të ngjajnë
po asnjë nuk e gjej asnjë për besë
Të kujtoj me tespije e me rrudha në ballë
me atë dashuri që na e jepje përherë
kujtoj ditët e netët me mikpritje
ku është fytyra jote që vetëm gëzonte
një këngë labe merrte sa e sa shtigje
e akoma më vjen pranë isoja jote
eja ta kthejmë së bashku shishen e rakisë
të pijmë për vitet e të na heqësh mallin
se kam ca sekrete të t’i them si shokut më të mirë
të nisemi bashkë e të kalojmë malin
se kam ftohtë baba në ditë kurbeti
ku fjala jote do ma bënte natën ditë
ah, pasjeta jote ditët na i treti
po kurrë nuk na e humbi krenarinë.
