I huaj …
Plaga nuk shëron plagën
as vuajtja vuajtjen
ndërsa jeta si vizatim
kërkon dorën
në dirigjimin e lapsit
për një përfundim
më të dinjitetshëm
Sa shumë plagë e vuajtje
u desh të kemi dikush
mbetet e pa kuptuar
se Perëndia
na mallkoi apo na bekoi
të skalitemi nëpër dallgët
e botës lavire me pak shije
e me shumë ngjyra
duke “fituar” dhunshëm
lloj-lloj epitete
Me status emigranti
si i huaj në vend tjetër
pa të drejtë i përbuzur
edhe në mëmëdhe si i huaj
në vendin e lindjes së
babait, gjyshit e stërgjyshit
aty ku paraardhësit tanë
jetuan den baba den …
Do të shkoj
Do të shkoj atje
ku rrezet e diellit lindin
mbi vargmalet e Sharrit të vjetër
që ngrohin jo vetëm trupin
po edhe më zellshëm shpirtin
se sa në çdo vend tjetër
Atje do të shkoj
për lëvizje të lirshme
gjithë ditën deri sa dielli
do të perëndojë duke u fshehur
pas maleve të Pashtrikut plak
për t’ia liruar hapësirën e qiellit
hënës së mrekullueshme
që të ndriçojë e rrezatojë
sipas stilit të saj
Nga këtu do të shkoj
sepse ndihem i huaj
atje do të jem
më i relaksuar
se kur lagem nga shiu
ndjej kënaqësi
sikur lulja për ujë
edhe kur nga dielli digjem
relaksohem unë
si buka kur piqet
do të shkoj nga këtu
në vendin tim të bekuar
atje ku ka baltë
më të ëmbël
se këtu mjaltë
Vendi i vendlindjes
Brodha sa andej e këndej
nëpër qytete e shtete
me lloj-lloj automjete
në tokë, ujë e ajër pa fund
si vendin e vendlindjes time
nuk gjeta askund
Vendlindja është krenari
vendi ku lind e rritesh
ndodh për një arsye apo tjetër
detyrohesh ndoshta të largohesh
mirëpo vazhdimisht e ke mendjen
e fiksuar të kthehesh
…
Edhe eshtrat pas vdekjes
kudo të prehen më të qetë
është vendi i vendlindjes
si e vetmja fole e vërtetë
