SA HERË VJEN NËNTORI
Sa herë që vjen Nëntori
Të gjithë duam të bëhemi
Adem Jashar e Ismail Qemal
Isa Boletin a Idriz Sefer
Oso Kukë a Mic Sokol
Dedë Gjo Lul a Sefë Kosharë…
Me plisin e bardhë në dritë të syrit
Bëjmë foto duke e puthur flamurin
Dhe fjalët i ngjyrosim krejt kuq e zi
Pastaj… Pastaj
Harrojmë të marrim frymë shqip
Nisim e bëjmë prapë jetë ujqërish
Kafshojmë njëri tjetrin
Kafshojme dhe Lirinë
Diellin Ia vërbojmë atdheut
Dhe Zotin… Edhe Zotin bre
Duam ta kemi veç për vete
