Ç’më vikan ca tinguj
sonte larë në vesë ,
mbi faqen e muzgut
derdhen valë -valë ,
si gjëmime gushti
bien n’timen zemër ,
herë shtruar- shtruar
herë ngritur dallgë .
Diku… tej një dasëm
sonte ngre siparin ,
gazmon njerëzia
muzika shpërthen ,
nën hapa kërcimtarësh
ndizet dyshemeja ,
dhe kënga dal prej shpirti
të bardhë udhën e gjen .
Ç’më paskësh marr malli
për harenë e saj ,
për këngët me iso
rrënjët te tabani ,
tundet lart shamia
drithëron në duar ,
flakëruar prush
si ta kërkon xhani .
Le të grisi qiejt
muzika këtë natë ,
sonte kjo dasëm
më solli kaq gëzim ,
në një tjetër kohë
ç’më çuan kujtimet ,
ku lumturia e një vatre
dhe për mikun ish gëzim .
