Ato flokët tua
Hedhur përmbi shpinë
Ti përkëdhel dua
Vashëz gjeraqinë
Syri yt i shkruar
Ngjyrën marrë qiellit
Më ke përvëluar
Moj rrezja e diellit
Buza jote kuqe
Si qershi e pjekur
E vogla burbuqe
Zemrën ma ke djegur
Të të puth njëherë
Buzë ndezura flakë
Dua të t’marr erë
Të heq k’të merak
Përmbi tëndin gjoks
Kokën të mbështes
Ëmbëlsisht të loz
Mos më lër të pres
I shikoj me ëndje
Të tuat veprime
Brenda zemrës tënde
Peng ke zemrën time
Sa herë shkon e vjen
Me sy m’shigjeton
Do ta gjej folenë
Kot po më mundon
Kur më hedh shikimin
E prek dashurinë
Te ti gjej shërimin
Lule trëndelinë
Me nazet e tua
Më ke lënë pa gjumë
Po më çmënd mua
Çdo ditë e më shumë
Moj flokë gështenjë
Derdhur përmbi sy
Dërgomë një shenjë
Vij të rri me ty
Zemrën ma ke marrë
Shpirti për ty m’digjet
Mos më lër të vrarë
Hapmi mike shtigjet
Falmë dashurinë
Mos më lër të pres
Gonxhe në lëndinë
O të marr, o vdes
