SI SHKOHET NË ATDHE
Kur është dimer e ngrin malli
tabelat me emra ndanë rrugëve
i mbulon bora
mjegulla bie mbi to verës
asnjë rrugë asnjë tabelë
nuk shkruan gjëkundi
si shkohet në atdhe
si shkohet në Kosovë
pyet Visar Zhiti
ah, më thuaj, si shkohet në atdhe
pyet ai
pastaj Kosovën do ta gjejmë
diku ne zemer te atdheut
ec e ec e ec
një shekull
Visar Zhiti pyet për Kosovën
një shekull
pyet mërgimtari për atdheun
në çdo pranverë e vjeshtë
i përcjell kojrilat
dhe dallëndyshen e Filip Shirokës
edhe kur shkojnë
edhe kur vijnë
dhe kurrë s´e gjeti rrugën
si shkohet në Ishullin e Ëndrrave
kur është ftohtë
e shpresa i sharron në fryjë bore
në detin e trazuar zgjohen ëndrrat
si ta gjejë sokakun e fëmijërisë
si ta hapë atë derë të shtëpisë
si t´ia vë një lule varrit t´babës
ku pushon ofshama e tij
afër lotit të nënës
apo aty ku e varrosën pritjen
