Është ndarë nga jeta në moshën 74 vjeçare poeti i njohur Bardhyl Londo. Lajmi është bërë i ditur nga miqtë e tij në Facebook. Mësohet se ai vuante nga një sëmundje e rëndë prej kohësh. Bardhyl Londo është poet dhe autor këngësh shumë i njohur. Ai ka studiuar për gjuhë dhe letërsi në Universitetin e Tiranës. Pas mbarimit të fakultetit ai punoi për disa vite mësues në Përmet dhe më pas për gazetën letrare “Drita”.
Kush është shkrimtari i shquar Bardhyl Londo?
Bardhyl Londo lindur në vitin 1948 në Përmet, Shqipëri. Studioi për gjuhë dhe letërsi në Universitetin e Tiranës. Pas mbarimit të fakultetit ai punoi për disa vite mësues në Përmet dhe më pas për gazetën letrare “Drita”.
Për disa kohë ka qënë kryetar i “Lidhjes së Shkrimtarëve dhe Artistëve” (LSHA). Krijmtaria e tij letrare përfshin 8 vëllime me poezi si edhe disa romane. Është fitues i çmimit “Migjeni”. Londo u përket intelektualëve që ndanë gjatë jetës së tyre dhe angazhimin në politikë. Për shumë vite ai ka qenë deputet në Kuvendin e Shqipërisë nën logon e Partisë Demokratike. Shpesh politika ndihet dhe në vargjet e tij të vona, të fokusuara më shumë te sfidat me të cilat është përballur vendi. Kritik ndaj qëndrimeve që mbahen sot ndaj letërsisë së sociorealizmit, ai ka bërë shpesh thirrje se duhet ndarë figura e artistit nga qëndrimi i tij politik dhe për ta gjykuar letërsinë pa qëndrimet politike.
Poeti me pardesynë e bardhë dhe vështrimin e thellë është padyshim një nga figurat më interesante të letërsisë shqipe të pas viteve ‘80.
AMANETET E POETIT
Nëse sytë e tu do të qëndrojnë të menduar
mbi këto vargje,
unë do të shoh
një ëndërr të bukur.
Nëse sytë e tu do të dridhen sado pak
nga këto vargje
unë i gjithi do t kumboj si një kitare
deri në agim.
Po nëse sytë e tu do të kalojnë indiferentë
mbi këto vargje,
atëherë unë do të kem vdekur.
Mos harro të vish në harrim.
