Rastet e grabitjeve e të vjedhjeve po vazhdojnë të rriten, ndërkohë që siguria për të lëvizur edhe në hapësirat publike po rrezikohet. Ndër rastet e shpeshta të grabitjeve janë gjësendet me vlerë, si stolitë e arit, telefonat e çantat e krahut që hajnat arrijnë t’i kapin nga qytetarët nëpër rrugë, raporton Gazeta Sinjali.
Viktimë e grabitjes ka qenë së fundmi një mërgimtar dhe e dashura e tij, të cilët u përballën me hajnat teksa ishin rrugës për në një hotel në Prishtinë.
Sinjali mëson se e gjithë ngjarja ka ndodhur në orët e vona, kur papritmas në një rrugicë ua zunë pritën dy persona, njëri prej të cilëve i armatosur.
Bazuar në dëshminë e viktimës, nën kërcënimin e armës hajnat morën prej tyre mbi 3 mijë e 500 euro dhe stolitë e arit.
Si rezultat i denoncimit, njësitë policore kanë kryer të gjitha ekzaminimet e nevojshme që ndihmojnë në zbardhjen e rrethanave të rastit dhe që çojnë në identifikimin e të dyshuarve.
Me urdhër të prokurorit, rasti është cilësuar ‘Grabitje’, ndërsa veprimet tjera ligjore do merren varësisht nga zhvillimi i hetimeve.
