Një ditë ..
Një ditë do të ikim edhe nga kjo botë
Pasi të kemi çliruar gjithë ç’mbajmë në shpirt.
Gjysma e qëllimeve që kemi luftuar është e kotë
Gjysma ishte thjesht një motiv.
Atëherë do të jemi mbushur plotësisht me rrudha
Por ndoshta do ta kemi çliruar tërësisht zemrën.
Gjysma e dhimbjes ishte dëshirë për të dhuruar
Gjysma për të mos u ndjerë vetëm.
Do të përqafohemi ndoshta për herë të fundit
Atëherë do të kemi çliruar edhe mendjet
Gjysma e lirisë për ëndrrën dhe trupin
Gjysma për tu falur edhe të tjerëve.
Kur nata bëhet e zezë
Kur nata nis të bëhet e zezë,…sterrë
Në qiell sikur nis një tjetër formë jetë.
Një jetë e paqtë, aq e qetë, si një ëndërr
E qielli mbushet pak nga pak me ëngjëj.
Nisin të shndrijnë mijëra yje të zjarrtë
E qielli nis festën me ëngjëjt e bardhë.
Nga gjumi ngrihem e rend nëpër natë
Në mes ttyre të gjej tim vëlla e tim atë.
Më humbin e ikin diku tej në errësirë
E mbetem e vetme, e vdekur, e ngrirë.
Asnjë shenje jetë në mes të dy botëve
Përveçse ëndërimeve e disa pika lotë.
Poezi dashurie
Dua të lexoj një poezi dashurie
ku dashuria të jetë përkatësi,
përkatësia të sjellë çaste lumturie
e lumturia të sjellë përjetësi.
Dua të krijoj një poezi dashurie
me ndjenja të kristalta si deti,
në brigje valësh,me puthje nën yje
derisa të zbardhë mëngjesi.
Dua të këndoj një poezi dashurie
që të zgjasi sa të zgjasë jeta,
me ndjenja hyjnore përkatësie
e të vdesë si Romeo e Xhuljeta!
