Askush nuk mund ta thotë me siguri absolute, se sa e vjetër është origjina e lojës së shahut, por hipoteza më e mundshme është se ka lindur në Indi.
Pse në fundin e një loje shahu, në të cilën mbreti kundërshtar pëson një sulm vdekjeprurës, thuhet: “Shah mat”? Termi vjen ndoshta nga persishtja që do të thotë fjalë për fjalë se: “Mbreti ka vdekur”. Origjina e kësaj loje mbetet shumë e errët. Megjithatë, shekullin e kaluar, shahu u pasurua me një tjetër aspekt: atë politik. Mjafton të përmendet ajo që është quajtur: “ndeshja e shekullit”. Takimi ndodhi në vitin 1972, mes kampionit të botës, sovjetikut Boris Spaskij, dhe sfidantit amerikan Robert James Fischer, i njohur ndryshe si “Bobby”. Ishte Lufta e Ftohtë, dhe të dyja superfuqitë përpiqeshin të kalonin njëra-tjetrën në gjithçka. Kështu që ndeshja Fisher-Spaskij u bë një betejë metaforike në Luftën e Ftohtë. Asokohe shahu ishte krenaria e regjimit sovjetik. Që në vitin 1914, Cari Nikolla II kishte krijuar titullin e “Mjeshtrit të Madh”. Në Bashkimin Sovjetik, shahu u bë një lloj sporti kombëtar, me qendra dhe shkolla që financoheshin nga shteti. Duhej siguruar epërsia që po zgjaste prej gati gjysmë shekulli. Kundër rusëve erdhi sfida e një amerikani gjenial.
Një njeri pa traditë, edukim shkollor apo ndonjë trajner me nivel prapa. Kush do ta fitonte ndeshjen në Reikjavik të Islandës? Edhe vendi i zgjedhur gjendej simbolikisht në gjysmën e rrugës ndërmjet dy botëve të kundërta. Fischer ishte një enigmë: psikologjikisht i paqëndrueshëm, dhe luante një lojë të paparashikueshme. Deri në minutat e fundit nuk ishte i sigurt nëse do të luante: për ta bindur, u desh ndërhyrja e vetë Sekretarit amerikan të shtetit, Henry Kissinger. Nga ana tjetër e tavolinës, presioni mbi Spaskij ishte i frikshëm. Fitoi amerikani, dhe rusët e humbën kryesimin pas 35 vjetësh. Loja zgjati gati 2 muaj.( 11 korrik – 2 shtator 1972). Në vitin 1975 Fisher refuzoi të takohej me sfidantin sovjetik, Anatoli Karpov, për këtë arsye FIDE (Federata Ndërkombëtare e Shahut) e skualifikoi nga gara dhe shpalli kampion Karpovin. Më pas, për 20 vjet Fisher u tërhoq nga garat zyrtare, duke u rikthyer vetëm për të mposhtur përsëri Spassky në një lojë të organizuar privatisht në vitin 1992 në Sveti Stefan, Mal të Zi, Jugosllavi.
