KALIMTARË TË LUMTUR
Kalimtarët e lumtur ecin gjithmonë
në rrugë pa mjegulla
duke mbajtur në këmbë këpucë të ndritshme
prej lëkure të hollë drerësh
Pemët pranë tyre fëshfërijnë
ca melodi orienti
dhe ata nuk e kthejnë kokën mbrapa
Kalimtarët e lumtur rrallë shkruajnë letra
edhe zogjtë i ndryshojnë cicërimat e tyre
duke i shndërruar krahët në harqe violinash
Mund ta shpjegoj këtë gjë
me teoritë e marrëdhënieve të ndërsjella
mes sendeve
ndonëse kjo nuk është një absolute
e përgjithshme
Fryma që shpërndajnë trupat e lumtur mes tyre
jep shpresë për ngjarje interesante
që pritet të ndodhin patjetër
Kalimtarët e lumtur janë libra
që vetë-shkruhen
dhe ndahen në kapituj
Kapitulli i parë duhet të ketë shumë entuziazëm
ndërsa kapitujt në vijim duhet të jenë
pasqyra aventurash
ku protagonisti dhe shkrimtari
fillojnë të marrin funksionet e njëri tjetrit
Kalimtarët e lumtur kanë kapele prej qiejsh…
