ai ka gjithçka këtu në kurbet, ka edhe një punë
që ia merr edhe kohën e pushimit
edhe orët e drekës edhe orët e gjumit
i ka do krahë që kujtimeve ua bën flatra
e kur malli i çon peshë ato kujtime
i lëshon të fluturojnë si pëllumbat mbi fshat
që i lëshonte dikur kur ishte i vogël
e ata sa mirë e hijeshonin qiellin e fshatit
edhe kulmet e shtëpive i hijeshonin
dhe gjithë fshatin e mbushnin britma gëzimi
ka edhe një jastëk që një ditë
mund të pëlcasë nga ëndrrat
ka edhe një shpresë në formë shamie
që e ka mbështjellë biletën e kthimit
mos t´ia brejë miu i harresës
që përditë e kërcënon nga vrima e frikës
ai ka gjithçka këtu në kurbet
i ka edhe dy këmisha që kur e vesh njërën
tjetrën e shtrin në telin e lodhjes t´i thahen djersët
ai ka gjithçka këtu në kurbet
ama bash gjithçka ka këtu në kurbet
përveç orarit të trenave
që nuk arriti ta mësojë kurrë
