Ai është aty ku shkrepin rrufetë
Një gur ka në zemër dhembjen e nënshtron
E ka zbutur koha shpesh del në qytet
Si luan nga grilat reklamat vrojton
I mungojnë lisat dimrat e ashpër
Krojet shtojzovallet ndoshta i mungojnë
Reliktin e vdekjes qefinin e pastër
Muzeut ia ka lënë turistët e kundrojnë
Dikur matej me lisat me majat me borë
Orteqet sfidonte me gunën e gjatë
Si gjymtyrë të tretë dhe një pushkë në dorë
Befas për të hyrë bujshëm në baladë
Herë si shkëmb i gjallë herë dinak në pritë
Një shirit të zi vrasës kanunor
Për t’u bërë muranë duhej sakrificë
Malet ia diktonin vetë fundin mizor
Ngujimet gjakmarrja sinonim i jetës
Përjetim i tij s’ka qenë plazhi deti
Jetën peng përherë fjalës edhe Besës
Diku bënin vdekjen…thotë në varg poeti
