Kosova ka vendosur rekord të ri në renditjen e FIFA-s. Pas ndeshjeve të fundit të Ligës së Kombeve, “Dardanët” janë ngjitur në pozitën e 76-të në botë, duke regjistruar renditjen më të mirë në historinë e tyre.
Rekordi i mëparshëm ishte pozita e 78-të, të cilën Kosova e kishte arritur në vitin 2026. Në renditjen zyrtare të korrikut, “Dardanët” ishin pikërisht në vendin e 78-të, ndërsa tash kanë bërë edhe dy hapa të tjerë përpara. Kosova ka kaluar Izraelin dhe Bolivinë në renditjen e përgjithshme. 
Ngritja është edhe më e dukshme nëse krahasohet me vitet e kaluara. Kosova e mbylli vitin 2025 në pozitën e 80-të, ndërsa në fund të vitit 2024 ishte e 99-ta.
Në vitin 2023 ishte në vendin e 101-të, kurse në vitin 2022 në pozitën e 107-të. 
Kështu, brenda vetëm katër viteve, Kosova është ngjitur nga pozita e 107-të në të 76-tën, ndërsa nga viti 2017, kur ishte në vendin e 177-të, përparimi është edhe më i madh.
Ky rekord i ri vjen pas një serie rezultatesh në Ligën e Kombeve, ku Kosova mori pesë pikë në katër ndeshjet e para dhe aktualisht mban pozitën e dytë në grup.
“Dardanët” do t’i zhvillojnë edhe dy ndeshje në nëntor, ndaj Izraelit dhe Irlandës, me mundësinë për ta përmirësuar edhe më tej pozitën në renditjen botërore.
