VASHË PËR BUKURINË TËNDE
Në brigje të largëta kujtimi
Më shpie ndjenja për bukurinë tënde
Kur ta kujtoj flokun e zi
gjiun e ngritur
Në maje gishtash eci
të mos zgjohem nga ëndrra
Edhe në rudina të shkelura
Edhe tek aromë e barit të kositur
Lulet që ta imitojnë buzëqeshjen kërkoj
Motet më marrin me vete si uji suvalat
Borë pleqërie m’i mbulon flokët
Valët imitojnë ritmet e zemrës
Dritat që lëvizin mbi to
Janë shikimet tua
Që më bëhen shpirt
Një ditë do të dalësh nga deti
Qoftë edhe si guacë
Ose unë do të futem
Në fund të fundit të detit
Të dashurisë për ty.
