Ata u puthën me zjarr atë mbrëmje
dhe cipa e qiejve u bë
një hartë buzëqeshje
Nuk u ndodha aty
por në librin e mbrëmjes
ishte shkruar gjithçka
dridhja e ajrit
parathënia e lëvizjeve
prekjet e para dhe psherëtimat
Etimologjia e zjarreve
që ndodhen në trupat e tyre
do të jetë e paqartë
Më vonë kur bukinistët
do ta marrin në dorë atë libër
do të ngelin në mëdyshje
dhe në vend që ta shesin
do ta mbajnë për vete
