ETJA IME E PËRJETSHME…
Unë pi etshëm jetë
në çdo çast e orë me ty
Të gjitha ditëve ua thith nektarin
Dhe përherë i etur mbetem
I mbledh të gjitha rrezet e diellit tënd
Dhe ua hedh syve
për të bërë më shumë dritë
Dritë më bëhen ditët
më qeshin sytë me ty
bëhemi qeshje yjesh
Çdo çast pi burim drite
Një etje e pashuar më merr
Për ty, dashuria ime
Çdo ditë frymoj me ty
shoh me zemër fëmije jetën
me të gjitha ngjyrat
Zjarrë i ëmbël më mbërthen
Kur prek dashurinë tënde
E shoh e ndjej
në çdo lëvizje
shpirtin tënd të bardhë e puth
Kur më shikon thellë
me ata sy të ëmbël
Ndjenja ime merr krahë flatron qiellit
Dorështrënguar ecim agimeve tona
Sikur duam t’ i shtrëngojmë çastet e ditët
Ta kapim gëzimin të mos ikën kurrë
Flasim e qeshim
marrëzisht lumturohemi
Vërtetë e përpijmë dritën
Yjeve ua vjedhim shkëlqimin.
