Më ra bretku
gjithë natën.
E dija
që s’ishe kësaj ane,
po të ishe
nuk do kisha motiv
të të kërkoja.
Ta them një sekret?
Kënaqem
kur s’të gjej.
Ndryshe,
do të të kisha gjetur
— dhe kjo fitore e vogël
s’do më entuziazmonte.
Kur të kërkoj,
dëgjoj muzikë.
Muzikën e dua
sa ty,
ose pak më pak se ty,
ose…
shumë më pak se ty.
Ç’rëndësi ka…
e vërtetë është
që do vdisja
pa muzikë.
Prandaj fshihu,
luajmë kukamcefti…
këngët tona.
