Lumi i Shalës atraksioni turistik i cilësuar si Tajlanda Shqiptare

Grykëderdhja e lumit të Shalës në liqenin e Komanit është kthyer në një nga destinacionet më tërheqëse lumore të Alpeve shqiptare. Izoluar nga majat e larta, rrjedha e vrullshme e ujit të kaltër të Shalës i ofron aventurierëve një panoramë nga ato që ngjajnë me Tajlandën e largët.

Lugina e Shalës, një zonë e virgjër lumore, e cila vetëm së fundmi është futur në guidat e agjencive turistike, po tërheq një vëmendje të veçantë, për shkak të natyrës së paprekur dhe mundësive të shumta që ofron.

Aventurierët e natyrës mund të shijojnë eksplorimin e zonës me varkë, ngjitjen në majat përreth me pamje spektakolare, si dhe zhytjen në ujin e freskët të lumit të Shalës. Aty ka dhe një plazh të vogël ku mund të bësh dhe banjo dielli.

Ata më aventurierët, arrijnë të shijojnë këtë destinacion të ri duke ngulur çadrat e kampingut për një eksperiencë plotësisht individuale, rrethuar nga majat e larta, për të cilat vendasit tregojnë legjenda mesjetare.

Sipas gojëdhënave, princi Lekë Dukagjini, prijësi i dytë më i rëndësishëm i shqiptarëve pas heroit Gjergj Kastriot Skënderbeu, i kaloi vitet e fundit të jetës në këtë zonë, ku gjen emërtime të tij, si për shembull “Guri i Lekës”, një pikë strategjike që sheh luginën, nga ku mendohej që Dukagjini ruante vendin nga ardhja e turqve.

Lumi i Shalës është një atraksion i ri, i cili ka pak kohë që ka filluar të frekuentohet. Ai i tërheq vizitorët me ujin e kristaltë dhe natyrën e mrekullueshme.

Pagëzuar tashmë si Tailanda e Shqipërisë, lumi i kaltër Shalës dhe zona përreth, janë një alternativë mahnitëse e Rivierës dhe vendeve të tjera më të përzgjedhura të bregdetit.

I famshëm për pastërtinë dhe ujin ngjyrë smeraldi, popullariteti i Lumit të Shalës është rritur ndjeshëm vitet e fundit, kur vendasit orjentohen gjithnjë e më shumë drejt veriut për idhëtimet e tyre në verë. Një lumë shumë i përshtatshëm për të notuar, Shala është i rrethuar nga një peizazh mbresëlënës dhe shpella befasuese. Një kredhje në ujërat brenda shpellës është një kënaqēsi e detyruar.

Lumi i Shalës, me gjatësi 37km, buron nga maja e Radohinës, mes Alpeve shqiptare, që ndryshe njihen me emrin Bjeshkët e Namuna. Lumi rrjedh dhe derdhet në Liqenin e Komanit, një tjetër destinacion i preferuar nga turistët vendas dhe të huaj. Për shkak të kësaj afërsie në fakt, këto dy vende janë të lidhur me tragetë të shpeshtë. Nēse vendos të marrësh tragetin, duhet të mbash parasysh faktin se kushdo që e ka provuar, nuk pushon së foluri për këtë përvojë. Ndaj përgatitu të mahnitesh vetë dhe të shastisësh miqtē e tu pas këtij udhëtimi!

Klima dhe topografia

Falë vendodhjes mes maleve të pjesës veriore, ajri rreth lumit si dhe uji i tij kanë një pastërti të qartë dhe janë rigjenerues. Një zhytje këtu është krejt ndryshe nga një larje në Rivierën “e gazuar”. Ndër të tjera duhet thënë se, edhe pse dimri është i acartë e i egër, stina e verës ështē befasisht e ngrohtë dhe e dashur dhe s’bën kurrë ftohtë. Lumi i Shalës, që ndodhet i futur në zemër të zonës gjeologjike të Alpeve shqiptare, karakterizohet edhe nga masivë gëlqerorë të zinj, për t’u mbajtur parasysh që të mund ta shijoni pamjen e tyre gjatë vizitës.